İnanıram ki, Bakı Su Həftəsi hökumət qurumları ilə yanaşı, özəl sektora, mütəxəssislərə yeni ideyalar əsasında problemlərin həlli üçün innovativ üsullar tapmaq imkanı yaradacaqdır. Bakı Su Həftəsi çərçivəsində təşkil olunan konfransda panel müzakirələri su ehtiyatlarının idarə edilməsi, su təchizatı və bununla bağlı digər mövzular üzrə problemlərin aradan qaldırılması üçün əlverişli platforma olacaqdır. Müzakirə zamanı praktik həllərin işlənib hazırlanması, eləcə də su ehtiyatlarının davamlı istifadə edilməsi və idarə olunmasının vacibliyi barədə ictimaiyyətin məlumatlandırılmasına da kömək edəcəkdir.

          Nəzərinizə çatdırmaq istəyirəm ki, Azərbaycanın su infrastrukturunun yaxşılaşdırılması dövlətin sosial-iqtisadi siyasətinin prioritet istiqamətlərindən biridir. Su təhlükəsizliyinin təmin edilməsi məqsədilə yerüstü və yeraltı su ehtiyatları yenidən qiymətləndirilir, su ehtiyatlarının inteqrasiyalı idarə edilməsi və içməli su təchizatının yaxşılaşdırılması istiqamətində mühüm işlər görülür.

          44 günlük Vətən müharibəsində qazanılan şanlı qələbə sayəsində 30 il ərzində düşmənin nəzarətində qalan ərazilərimiz işğaldan azad olundu. Hazırda işğaldan azad edilmiş ərazilərdə yeni su anbarları tikilir və mövcud olan su obyektləri əsaslı şəkildə bərpa olunur. Su layihələrinin reallaşdırılması Qarabağa həyat verəcək. Bu layihələr, eyni zamanda, keçmiş məcburi köçkünlərin həyat şəraitinin yaxşılaşdırılmasına, məşğulluğun artırılmasına və ölkədə ərzaq təhlükəsizliyinin təmin olunmasına hesablanıb.

          Bakı Su həftəsi yeni təşəbbüslər və səmərəli işgüzar əlaqələrin qurulması,  ölkəmizin su təsərrüfatının inkişafına yeni töhfələr verəcəkdir.

          Ümid edirəm ki, Bakı Su Həftəsi çərçivəsində hər birinizə yeni imkanlar yaranacaq və qarşılıqlı əməkdaşlıqlar qurulacaqdır.
          Bir daha hər birinizə sərgi və konfransın işində uğurlar arzulayıram.
         
          Hörmətlə, 
          Azərbaycan Dövlət Su Ehtiyatları Agentliyinin sədri Zaur Mikayılov