Baku Water Week: su ehtiyatlarının idarə olunmasında unikal ideyalar və layihələr
Sentyabrın 12-də Bakı Ekspo Mərkəzində “Baku Water Week” – Su Təsərrüfatı üzrə 2-ci Beynəlxalq Sərgi və Konfrans öz işini başa çatdırdı. Tədbir Azərbaycan Dövlət Su Ehtiyatları Agentliyinin dəstəyi ilə keçirilib. Təşkilatçısı “Caspian Event Organisers” şirkəti, beynəlxalq tərəfdaşları isə “Caspian Event Management” və “ICA Events”dir.
“Baku Water Week” sərgi və konfransında Avstriya, Azərbaycan, Belarus, Böyük Britaniya, Macarıstan, Almaniya, Hindistan, İsrail, Səudiyyə Ərəbistanı, Serbiya, Sinqapur, ABŞ, Türkiyə, İsveçrə və İsveçdən təxminən 70 şirkət və nümayəndə heyəti iştirak edib.
Sərginin və konfransın əsas məqsədlərindən biri Azərbaycana yeni texnologiyalar və investisiyalar cəlb etmək, bu sahənin regionda daha da inkişafına töhfə vermək, həmçinin vacib məsələlərin, yeni layihələrin və əməkdaşlıq imkanlarının müzakirəsini təşkil etmək olub. Bu baxımdan, “Baku Water Week” istehsalçılar, dövlət qurumları və xarici investorlar üçün əməkdaşlıq və uzunmüddətli tərəfdaşlıq üçün unikal görüş platforması rolunu oynayıb.
Son illərdə Azərbaycan Respublikasının Prezidenti İlham Əliyev tərəfindən müəyyən edilmiş təxirəsalınmaz tədbirlər çərçivəsində ölkədə mühüm layihələr həyata keçirilib. Qəbul edilmiş milli su strategiyası qarşıdakı onilliklər üçün aydın hədəflər müəyyən edir: su ehtiyatlarının ədalətli və səmərəli idarə olunması, infrastrukturun modernləşdirilməsi və rəqəmsal texnologiyaların tətbiqi, alternativ və dayanıqlı su mənbələrinin inkişafı, elmin, innovasiyaların və beynəlxalq əməkdaşlığın gücləndirilməsi.
Sərgidə müxtəlif məhsul və xidmətlər nümayiş olunub: analiz və laboratoriya texnologiyaları, boru və boru kəməri avadanlıqları, süni yağış texnologiyaları, drenaj avadanlıqları, hidrotexniki qurğular, içməli suyun təmizlənməsi, su təchizatı və kanalizasiya sistemləri, tikinti və qazma texnikası və digər su təsərrüfatı avadanlıqları. Tədbir çərçivəsində dövlət qurumları, özəl sektor və innovativ startaplar arasında əməkdaşlığın inkişafına yönəlmiş B2B və B2G görüşlər keçirilib.
“Baku Water Week 2025” təşkilatçıları zəngin bir işgüzar proqram təqdim ediblər. Əsas mövzulara su ehtiyatlarının idarə olunması, suyun səmərəli istifadəsi, qlobal iqlim dəyişiklikləri, su təhlükəsizliyi, su təsərrüfatında innovativ yanaşmalar, su diplomatiyası və yeni texnologiyalar və təcrübələr daxil idi.
Birinci gün təqdimat zonasına “Su təmizlənməsi üçün kompleks həllər” və “Su təchizatı və tullantı sularının idarə olunmasında kompleks mühəndisliklə zəmanətli nəticələrin əldə olunması” adlı təqdimatlar keçirildi. Həmçinin “Qlobal iqlim dəyişiklikləri: Azərbaycanda quraqlıq risklərinin idarə olunması” üzrə case-session, “Xəzər dənizinin mövcud vəziyyəti: problemlər və onların həlli yolları” üzrə ekspert müzakirəsi və “Tullantı sularının dayanıqlı idarə olunması: COP29 məqsədlərinə doğru” sessiyası baş tutdu.
Sentyabrın 11-də “Baku Water Week 2025” çərçivəsində Azərbaycan Dövlət Su Ehtiyatları Agentliyi tərəfindən 2-ci Beynəlxalq Su Təsərrüfatı Konfransı keçirildi.
Konfransda çıxış edən ADSEA sədrinin birinci müavini Xəyyam Məmmədov vurğuladı ki, su ehtiyatlarının idarə olunması artıq yalnız milli deyil, həm də qlobal məsələdir. Onun sözlərinə görə, əməkdaşlıq, təcrübə mübadiləsi və birgə təşəbbüslər xüsusi əhəmiyyət daşıyır və konfrans gələcək addımlarımızı müəyyən edəcək layihə və təkliflərin müzakirəsi üçün əla platformadır.
Plenar sessiyada “Su ehtiyatlarının idarə olunmasında liderlik: regional və qlobal perspektivlər” mövzusunda çıxışlar oldu. Sessiyanın moderatoru Arizona Dövlət Universitetinin professoru Olcay Ünver idi. Sessiyada ADSEA sədri Zaur Mikayılov, kənd təsərrüfatı naziri Məcnun Məmmədov, Azərbaycan Respublikasının Prezidentinin iqlim məsələləri üzrə xüsusi nümayəndəsi, COP29-un prezidenti Muxtar Babayev, ACWA Power şirkətinin baş direktoru Marko Arçelli və ekologiya və təbii sərvətlər nazirinin müavini Rauf Hacıyev çıxış etdilər.
“Baku Water Week” tədbirinin keçirildiyi üç gün ərzində Bakı Ekspo Mərkəzinin foyesində azad olunmuş Qarabağda yerləşən Zabuxçay su anbarının, “Şiber” adlı su çarxının, Qovsan aerasiya stansiyasının, Bakı su təchizatı sisteminin, Oğuz–Qəbələ su təchizatı sisteminin maketləri və su tarixinə dair sərgilər nümayiş olunurdu.
İnklüziv “Ümid var” cəmiyyətinin üzvləri “Baku Water Week 2025 xüsusi insanların gözü ilə” mövzusunda hazırladıqları əsərləri təqdim etdilər. Həmçinin Hackathon müsabiqəsinin qalib komandaları mükafatlandırıldı.
Beləliklə, Bakı Su Həftəsi Azərbaycanda su ehtiyatlarının idarə olunmasının səmərəliliyinin artırılmasına, yeni təşəbbüslərin və faydalı biznes əlaqələrinin formalaşmasına mühüm töhfə verdi.
AZ
EN
RU
ZH
